Fransa Peşəkar Futbol Liqası koronavirus pandemiyasına görə ölkədə çıxış edən bir sıra legioner futbolçulara məhdudiyyətlər qoyub.

Sportfm.az xəbər verir ki, yeni qərara əsasən Liqa 1 və Liqa 2-də çıxış edən Avropa Birliyinin üzvü olmayan ölkələrin futbolçuları öz millisinə buraxılmayacaq.
Liqa 1 və Liqa 2-dən 40 klub ölkəyə qayıtdıqda 1 həftə karantinə alınmaq və virusa yoluxmaq riskinə görə Avropa Birliyinin üzvü olmayan ölkələrdən olan futbolçuların milli komandalarına göndərilməməsini istəyib. 

Bu isə o deməkdir ki, “Lill”də çıxış edən Burak Yılmaz, Yusuf Yazıcı və Zeki Çelik, o cümlədən Liqa 2 təmsilçisi “Le Havre”də oynayan Umut Meraş Türkiyə millisinin DÇ-2022-nin seçmə mərhələsinin oyunlarında iştirak etmək üçün ölkələrinə gedə bilməyəcəklər.

Adıçəkilən 4 futbolçu üçün Fransaya təyyarə göndərmək istəyən Türkiyə Futbol
Federasiyası qarşı tərəfin cavabını gözləyir. Federasiyanın alternativ variantlar üzərində işlədiyi bildirilib.

Qeyd edək ki, Türkiyə millisi DÇ-2022-nin seçmə mərhələsində martın 24-də Niderland, 30-da isə Latviya millisini qəbul edəcək. (qol.az)