Bu gün Paris-2024 Yay Olimpiya Oyunlarında üçüncü gündür.
Sportfm.az xəbər verir ki, Azərbaycanın 6 idmançısı mübarizəyə qoşulacaq.

Cüdo

Azərbaycanın medal ümidlərindən olan cüdoçu, dünya çempionu Hidayət Heydərov da tatamiyə bu gün çıxacaq. Mübarizəyə 1/8 finaldan başlayacaq Heydərovun rəqibi Tohar Bitbul (İsrail)-Reduan Masud Dris (Əlcəzair) cütünün qalibi olacaq.

Cüdo yarışları saat 12:00-dan başlanacaq.

Badminton

Saat 10:30-da badminton (qadınlar, fərdi) yarışlarında 2-ci tur başlanır. Qrupda ilk görüşünü uduzmuş Keişa Fatimə Zəhra (Azərbaycan) Kirsti Gilmor (Böyük Britaniya) ilə qarşılaşacaq.

Saat 22:20-də isə kişilərin fərdi yarışında Edi Reski Dviçayo (Azərbaycan) ilk qrup matçında Kollins-Valentin Filimon (Avstriya) ilə üz-üzə gələcək.

Qılıncoynatma

Bu gün Azərbaycan qılıncoynadanı Anna Başta da yarışda ilk matçına çıxacaq. O, 1/16 finalda Yanq Henqyu (Çin) ilə görüşəcək. Görüşün təxminən saat 12:25-də başlaması nəzərdə tutulub.

Boks

Bu gün boks yarışlarında Azərbaycanın daha 2 boksçusu mübarizəyə qoşulacaq. Əvvəlcə +92 kq çəki dərəcəsində 2 dəfə dünya çempionatının bürünc mükafatçısı Məhəmməd Abdullayev rinqə çıxacaq. 1/8 finalda onun rəqibi Nelvi Tiafak (Almaniya) olacaq. Görüşün saat 14:52-də başlaması nəzərdə tutulur.

Bakı vaxtı ilə saat 22:48-də isə daha bir Azərbaycan boksçusu - 63,5 kq. çəki dərəcəsində yarışan Malik Həsənov Laşa Quruli (Gürcüstan) ilə qarşılaşacaq.

Xatırladaq ki, Azərbaycan 33-cü Yay Olimpiya Oyunlarına 48 idmançı ilə qatılıb. Onlardan 4-ü (cüdoçular) mübarizəni medal qazanmadan dayandırıb.

Oxşar xəbərlər

Bu gün millimiz mübarizəyə başlayır - Paris-2024

"Hido" finalda - PARİS - 2024

Ümidimiz Hidayət Heydərov yarımfinalda - PARİS - 2024

3 idmançımız mübarizəyə başlayır - Paris-2024

İdmançılarımız bu gün mübarizəyə başlayır - Paris-2024