Azərbaycan millisinin ağırlıqqaldıranı Boyanka Kostovanın orqanizmində istifadəsi qadağan olunan preparatın tapılması rəsmən açıqlanıb.

Komanda.az xəbər verir ki, Kostovanın adı Beynəlxalq Ağırlıqqaldırma Federasiyasının açıqladığı siyahıda yer alıb.

2012-ci ildə Londonda keçirilən Yay Olimpiya Oyunlarında bolqar əsilli güləşçidən götürülən analiz təkrar yoxlamada müsbət nəticə verib. Onun orqanizmində deqidroxlorometiltestosteron və stanozolol maddələri aşkarlanıb. Milliləşdirilmiş güləşçimiz yenidən yoxlanacaq. Ondan götürüləcək B testi də müsbət nəticə versə, o, diskvalifikasiya olunacaq.  

Ötən həftə yığmamızın daha 6 ağırlıqqaldıranı dopinqdə "ilişmişdi”. ABŞ-ın Hyuston şəhərində təşkil olunan dünya çempionatında dopinq testdən keçə bilməyən Elxan Əliquluzadə, Silviya Angelova, Firudin Quliyev, Valentin Xristov və İntiqam Zairov 8 il müddətinə diskvalifikasiya olunub. Onların cəzaları 2023-cü ilin dekabrında yekunlaşacaq. Dadaş Dadaşbəyli isə 4 illik cəzaya məruz qalıb. Onun cəza müddəti isə 2019-cu ilin dekabrınadək nəzərdə tutulub. Həmçinin Xristovun həmin çempionatda qazandığı bürünc medalı əlindən alınıb.