Sportfm.az xəbər verir ki, bu gün təmsilçilərimizin iştirakı ilə 3 qarşılaşma baş tutacaq. 

İlk matçına çıxacaq "Zirə" Qazaxıstan təmsilçisi ilə qarşılaşacaq. Belə ki, Samir Abasov komandasını "Taraz”la oyunda sınayacaq. Premyer Liqa təmsilçisi ilə görüş Bakı vaxtı ilə saat 17.00-da başlayacaq.

"Zirə” Türkiyədə daha 3 sınaq matçı keçirəcək. Paytaxt təmsilçisi yanvarın 18-də "Voluntari” (Rumıniya), 23-də "Vorskla” (Ukrayna), 26-da isə "Şkupi” (Makedoniya) ilə qarşılaşacaq.

"Səbail" də Türkiyədə ilk yoxlama matçına çıxacaq və Macarıstanın "Aqvital” klubu ilə üz-üzə gələcək. Görüş Bakı vaxtı ilə saat 18.00-da start götürəcək.

Qeyd edək ki, "Aqvital” Macarıstanın birinci divizionunda çıxış edir. "Səbail" Antalya hazırlığı müddətində 4 yoxlama oyunu keçirməyi planlaşdırır.

Qış fasiləsində sınaq matçlarına bu gün start verəcək "Sumqayıt” isə Qazaxıstanın "Jetısu” klubu ilə qüvvəsini sınayacaq. Matç Bakı vaxtı ilə saat 18.30-da başlayacaq.

"Sumqayıt” Antalyada daha 3 yoxlama oyunu keçirəcək. "Kimyaçılar” yanvarın 19-da Bosniya və Herseqovinanın "Çelik", 22-də Makedoniyanın "Vardar", 26-da isə Serbiyanın "Zemun" klubu ilə qarşılaşacaq.