Azərbaycan Premyer Liqasının XIII turu Yunis Hüseynovun "Kəpəz"in baş məşqçisi postunda debütü ilə əlamətdar olacaq.

Sportfm.az saytı apasporta.az-a istinadən xəbər verir ki, 52 yaşlı mütəxəssis uzun fasilədən sonra ölkə çempionatına komanda çıxaracaq.

Bu, Gəncə təmsilçisinin "Qəbələ" ilə ev oyununda rəsmiləşəcək. Autsayderi çətin vəziyyətdən çıxarmalı olan Hüseynov 2 ilə yaxın sürən fasilədən sonra yenidən Premyer Liqa həyəcanı yaşayacaq.

Hüseynov üçün sonuncu belə qarşılaşma 2015/16 mövsümünə təsadüf edib. Həmin vaxt "Xəzər Lənkəran"ı çalışdıran mütəxəssis qış fasiləsi öncəsi postundan istefa vermişdi. Baş məşqçinin postundakı son qarşılaşması isə 2015-ci il dekabrın 20-də baş tutub.

Həmin gün Hüseynovun baş məşqçisi olduğu "Xəzər Lənkəran" "İnter"in, yəni indiki "Keşlə"nin qonağı olub. Bakıda keçirilən matçda meydan sahibləri 2:0 hesabı ilə qalib gəlib.

Ümumiyyətlə isə 52 yaşlı mütəxəssis 4-cü komanda ilə Premyer Liqa həyəcanı yaşayacaq. O, indiyədək "Karvan", "Standard" və "Xəzər Lənkəran"ı çalışdırıb. "Kəpəz" əvvəlki komandalardan onunla fərqlənir ki, Hüseynov karyerasında ilk dəfə futbolçu kimi də şərəfini qoruduğu kluba rəhbərlik edəcək. Əvvəlki üç klubu onun futbolçu karyerasını bitirdiyindən sonra yaranıb və tarixin də yaddaşına köçüb. Mütəxəssis indi çalışdırdığı "Kəpəz"ə 1998-99 və 2000-01-ci illərdə futbolçu kimi xidmət edib.

Oxşar xəbərlər

Yunis Hüseynov istefa verdi

Yunis Hüseynov 100-ə çatdı - Qələbə sayında

Yunis Hüseynov üçün əlamətdar oyun - 80-ci qələbə

"Yunis müəllim Gəncə üçün doğma insandı" - "Kəpəz"in üzvü

Yunis Hüseynov "Kəpəz"də baş məşqçi postunu hansı şərtlərlə qəbul edib - ÖZƏL