Noyabrın 24-də UEFA Avropa Liqasının qrup mərhələsinin V turunun oyununda "Qəbələ” Belçikanın "Anderlext” komandasını qəbul edəcək. Sportfm.az xəbər verir ki, "Bakcell Arena”da baş tutacaq "Qəbələ” – "Anderlext” matçı öncəsi baş məşqçilərin mətbuat konfransı keçirilir. İlk olaraq jurnalistlərin önünə "Qəbələ”nin baş məşqçisi Roman Qriqorçuk və komandanın forvardı Baqali Dabo çıxıb. Ukraynalı çalışdırıcı matçın turnir cədvəli baxımından heç bir əhəmiyyət daşımadığını bildirib:"Qrupdakı rəqiblər bizdən bir baş üstündür. Buna baxmayaraq, uğurlu nəticə qazanmaq üçün əlimizdən gələni edəcəyik. Hücumçumuz Zenyov bu matçda bizə kömək edə bilməyəcək. Əvəzində Dabo və Nika artıq sıraya dönüb. Bu oyunda ehtiyat qüvvəni görmək istəyirəm. Belə matç meydana çıxacaq futbolçular üçün güclü motivasiya olmalıdır. Biz meydandan qalib ayrılacağımıza inanırıq. "Qarabağ" üzərində qələbəni daha vacib sayıram".