Futzal üzrə Azərbaycan milli komandası bu gün Avropa çempionatının final mərhələsində mübarizəyə başlayacaq.

Sportfm.az xəbər verir ki, Joze Alesio Da Silvanın baş məşqçi olduğu kollektiv D qrupundakı ilk oyununda Gürcüstan yığması ilə qarşılaşacaq.

Niderlandın Qroningen şəhərindəki "Martini Plaza"da oynanılacaq görüş Bakı vaxtı ilə saat 17:30-da start götürəcək. Matçı fransalı referi Sedrik Pelisye idarə edəcək. Digər hakimlər isveçrəli Daniel Matkoviç və xorvatiyalı Nikola Yeliç olacaq. Koronavirus pandemiyası səbəbindən oyun azarkeşsiz keçiriləcək. Bu qrupun digər oyununda İspaniya millisi Bosniya və Herseqovinanı sınağa çəkəcək.

Azərbaycan seçməsi 6-cı dəfə qitə çempionatının final mərhələsində mübarizə aparacaq. Yığmanın heyətində 2 futzalçının meydana çıxıb-çıxmayacağı sual altındadır. Qapıçı Rövşən Hüseynli və müdafiəçi Qallodan götürülmüş analizlərin nəticəsi müsbət çıxıb. Buna görə də hər iki futzalçıdan PCR testi götürülüb və cavablar oyun günü açıqlanacaq. Testin nəticəsi neqativ çıxarsa, hər iki futzalçı Gürcüstanla matçda iştirak edə biləcək.

Oyun öncəsi son məşqdən əvvəl Azərbaycan Futzal Federasiyasının prezidenti, AFFA İcraiyyə Komitəsinin üzvü Zaur Axundov futzalçılarla görüşüb və Gürcüstan yığması ilə qarşılaşmada qələbə qazanmağın vacib olduğunu bildirib.

Avropa çempionatı

D qrupu, I tur

22 yanvar

17:30. Gürcüstan - Azərbaycan

Baş hakim: Sedrik Pelisye (Fransa)

Qroningen. "Martini Plaza".

20:30. Bosniya və Herseqovina - İspaniya

Qeyd edək ki, Azərbaycan millisi D qrupundakı ikinci oyununu yanvarın 26-da İspaniyaya qarşı keçirəcək.

Oxşar xəbərlər

Azərbaycan millisi həlledici oyuna çıxır - Avropa çempionatı

Azərbaycan millisinin 2 futzalçısı sıraya döndü

Azərbaycan millisi İspaniya ilə bərabərə qaldı - Avropa çempionatı

Azərbaycanın millisi ilk oyunda məğlub oldu - Avropa çempionatı

Azərbaycan yığmasının oyunlarının təqvimi açıqlandı - Avropa çempionatı