Matçın əvvəllərindən "Qarabağ” böyük ərazi üstünlüyünə yiyələnib, ardıcıl hücumlar qururdu. Bunun da əsas səbəbi ağdamlıların fərdi ustalıq baxımından rəqib futbolçuları üstələməsi ilə bağlı idi. Lakin "Qarabağ”ın hücumlarında lazım olan rəngarənglik və kəsərlilik çatışmırdı. Təbii ki, soyuq və qarlı hava komandanın oyununa təsir edirdi. Həmçinin Riçardın yoxluğu və Daninin sol cinahda öz potensialını aça bilmədiyini də qeyd etmək lazımdır. Buna görə də ispan yarımmüdafiəçi tez-tez mərkəzdə və hətta sağ cinahda peyda olurdu.

"İnter” isə müdafiəyə böyük qüvvə ayırdığından təhlükəli hücum təşkil edə bilmirdi. "Bankirlər” topu ələ keçirən kimi dərhal ön xəttə ötürmə edir, burada isə Rauf Əliyev, eləcə də ona cinahlardan dəstək verən Ağabala ilə Nizami rəqib qapısına yol tapmağa çalışırdı. Lakin "İnter” hücumda çoxala bilmədiyindən "Qarabağ” müdafiəçiləri üçün bu həmlələri dəf etmək heç də çətinlik yaratmırdı.