"Neftçi”də yubiley tədbirləri çərçivəsində futbolçuların forma və nömrələri ilə yanaşı, heyətdə də bəzi dəyişikliklər diqqət çəkirdi. Zədəli Pavel Dreksanın yoxluğunda Elxan Abdullayev Jayro və ya Elvin Bədəlova güvənməyərək, kapitan Ruslan Abışovu müdafiənin mərkəzinə çəkmək qərarına gəlmişdi. Belədə yenidən start heyətinə qayıdan Zdenek Folprext dayaq yarımmüdafiəçisi mövqeyində Tərzin Cahangirovla tandem təşkil edirdi. Elxan müəllimin hücumda Seqoviaya yox, Barqasa şans verməsi də maraqlı məqamlardan idi.

Həqiqətən də "Neftçi”nin belə oyunu qarşısında "İnter” çətin anlar yaşayırdı. Qonaqlar müdafiədə çoxluq təşkil edərək, rəqib hücumlarının qarşısını çox çətinliklə ala bilsələr də, səmərəli əks-hücumlar qurmağı bacarmırdılar. Belədə komandanın əsas ümidi standart vəziyyətlərə qalmışdı. Təsadüfi deyil ki, "İnter” ilk təhlükəli hücumunu da 18-ci dəqiqədə cərimə zərbəsindən sonra yaratdı: Xizanişvilinin zərbəsinin qarşısını Ruslan Abışov ala bildi. Məhz bu epizoddan sonra "İnter” özünə gəlməyi və oyunu bərabərləşdirməyə nail oldu. Lakin "Neftçi” tədricən rəqibi yormağı bacararaq, hissənin sonlarına doğru hücumlarının sayını artırdı. Nəhayət, 42-ci dəqiqədə cərimə meydançası daxilində topu ələ keçirən Barqas hesabı açmaqla yanaşı, Elxan Abdullayevin hücumdakı seçiminin də doğru olduğunu isbatladı.

Hesabda geri düşən "İnter” 2-ci hissəyə daha fəal başladı. Svanadze yetirmələrinə mövqelər üzrə daha irəlidə qərarlaşmağı tapşırmışdı. Bununla belə, "ağ-qaralar” rəqib futbolçulara qarşı yaxın oynayır, onlara "əl-qol açmağa” imkan vermirdilər. Top "Neftçi”də olduqda isə flaqman təhlükəli əks-hücumlar qura bilirdi. Bir sözlə, ikinci hissədə "İnter” nə qədər cəhd etsə də, üstünlüyü ələ almağı bacarmadı. Əksinə, fasilədə Namiq Ələsgərovu əvəzləmiş Rəhman Hacıyev 69-cu dəqiqədə 2-ci qolu vurmaqla Elxan Abdullayevin daha bir addımının doğru olduğunu göstərmiş oldu. Düzdür, cəmi 2 dəqiqə sonra Nizami Hacıyev hesab arasındakı fərqi azalda bildi. Lakin burada Svanadzenin hansısa müdaxiləsinin rolundan yox, Nizaminin fərdi bacarığından danışmaq lazımdır.  Ümumiyyətlə, Zaur Svanadze komandası məğlub durumda olmasına baxmayaraq, yenə də risk etməyə, ən azı dördlü müdafiə xəttinə keçməyə ehtiyac duymadı. Cəmi 2 dəyişiklikdən istifadə edən baş məşqçi eynimövqeli oyunçuları əvəzləməklə kifayətləndi. Lakin bu dəyişiklər lazımınca effekt vermədi və "Neftçi” yubiley günündə qələbəyə sevinməklə yanaşı, 4-cü yer uğrunda mübarizəyə də yaxından qoşulmuş oldu.