Fransanın paytaxtı Parisdə cüdo üzrə "Böyük dəbilqə" turnirinə start verilib.
Sportfm.az xəbər verir ki, yarışın ilk günündə Azərbaycanın 6 təmsilçisi mübarizəyə qoşulub.
Altmış kiloqram çəki dərəcəsində ölkəmizi təmsil edən Balabəy Ağayev fransalı Jolan Florimont və yaponiyalı Genki Koqaya qalib gələrək yarımfinala yüksəlib. Bu mərhələdə monqolustanlı Sumiyabazar Enxtaivana şans verməyən cüdoçumuz finala vəsiqəni təmin edib. Balabəy Ağayev həlledici qarşılaşmada rusiyalı Ramazan Abdulayevlə üz-üzə gəlib. Rəqibini ipponla məğlub edən idmançımız mötəbər yarışın qızıl medalına sahib olub.

Digər cüdoçumuz Hidayət Heydərov (73 kq) Fransa təmsilçisi Enzo Gibellidə, ardınca almaniyalı Aleksandr Qablerdən üstün olub. Avropa çempionumuz dörddəbir finalda tacikistanlı Somon Mahmadbekovla bacara bilməyib. Təsəlliverici görüşdə rusiyalı Denis Yartsevi üstələyən təmsilçimiz üçüncü yer uğrunda görüşdə yerli idmançı Giyom Şen ilə üz-üzə gəlib. Hidayət Heydərov rəqibini ipponla məğlub edib və nüfuzlu yarışın bürünc medalına layiq görülüb.
Digər cüdoçularımız isə erkən mərhələlərdə uduzaraq mübarizəni dayandırıblar.
Qeyd edək ki, oktyabrın 17-dək davam edəcək turnirdə 46 ölkədən 283 cüdoçu qalib adı uğrunda yarışır.

Oxşar xəbərlər

İlk gündə 3 medal - “Böyük Dəbilqə”

Cüdoçularımızdan 4 medal - İslamiada

Balabəy Ağayev finala yüksəldi, Hidayət Heydərov üçün bürünc şansı - Böyük Dəbilqə

Cüdoçumuz festivalın bürünc medalına sahib oldu

Hidayət Heydərov yarımfinala vəsiqə qazandı